İKT bilik və bacarıqlarına mükəmməl yiyələnməyin ən yaxşı yolu onun orta məktəbdən başlanmasıdır. Təhsilin ibtidai siniflərdən İKT əsasında qurulması şagirdlərin gələcəkdə savadlı kadr kimi yetişməsində mühüm rol oynaya bilər.

 İbtidai siniflərdə İKT-nin tətbiqi şagirdlərdə ətraf aləmi informasiya baxımından təhlil etmək və müvafiq nəticələr çıxarmaq bacarıqlarının formalaşdırılmasına imkan yaradır. İnformasiya ilə işləmək bacarığı müxtəlif praktiki üsullara bələd olmağa, həmçinin, müasir texniki vasitələrlə informasiya mübadiləsi aparmağa  kömək edir.

İKT-nin dərslərdə tətbiqi təlimin motivasiyasını gücləndirir, şagirdlərin dərketmə fəaliyyətini aktivləşdirir.

Dərslərdə İKT-dən istifadə dərslərin yüksək estetik və emosional səviyyədə keçirilməsinə imkan verir, əyaniliyi təmin edir, böyük həcmdə didaktik materialların cəlb edilməsinə kömək edir, bu isə öz növbəsində bir dərsdə şagirdlərlə görülən işin həcmini bir neçə dəfə artırır, şagirdlərə diferensial yanaşmanı təmin edir.

İKT-nin tətbiqi şagirdlərdə müstəqil işləmək, şagirdlərin tədqiqat aparmaq imkanlarını genişləndirir, ən əsası isə,  təhsilin keyfiyyətinin artmasına gətirib çıxarır.

Müəllimin dərslərdə elektron resurslardan istifadə etməsi şagirdlərdə tədrisə müsbət münasibət formallaşdırır, onların dərslərdə emosional durumunu yaxşılaşdırır. Hal hazırda məktəblərdə müəllimlər özləri elektron resursları bir neçə üsulla hazırlayırlar və dərslərdə onlardan istifadə edirlər.

Ən geniş yayılmış üsul – ibtidai sinif dərslərində multimedia təqdimatlarından istifadə edilməsidir. Burada olan multimedia elementləri - animasiya, mətn, şəkil, səs və digər komponentlər təlimin müsbət nəticələrinə güclü təsir göstərir. Təqdimatlardan istifadə edilməsi müasir dərslərin əsas cəhətlərindən olan – dərslərin cəlbedici olmasını təmin edir. Təqdimatlar nəticəsində dərslərdə fəallığı ilə çox da seçilməyən şagirdlər də aktivləşir, müzakirələrdə iştirak edir və öz fikirlərini sərbəst olaraq ifadə edirlər.

Tədrisin professional keçirilməsi üçün lazımlı materialların axtarışına və hazırlanmasına müəllimlər müəyyən vaxt sərf edirlər. MİMİO İnteraktiv lövhələri dərsləri daha maraqlı edir və keçilən materialın şagird tərəfindən daha yaxşı qavranmasına şərait yaradır.

Rənglərin müxtəlifliyi müəllimə, vacib məqamları ayıraraq onlara diqqəti cəlb etmək, ümumi fikirləri əlaqələndirmək və ya onların fərqini göstərmək, eləcə də düşüncə istiqamətini nümayiş etdirməyə imkan yaradır.

Mən hesab edirəm ki, tədris prosesində İKT-nin tətbiqi təlimin ən vacib məqsədlərindən olan – bilik və bacarıqlara yiyələnmə səviyyəsinin yüksəldilməsini təmin edir.